.png "Le Maroc Que J'adore")
شري سيارة مستعملة وانت هاني
أول حاجة كادير كاتجيب ميكانيك لي كيقلب ليك الطوموبيل وكيقول ليك لحديدة مزيانة توكل على الله، وحتى عند الفحص التقني.
ومن بعد ما كتبيع وتشري مع مول السيارة كتجمع دوصي وكتمشي للادارة ديال التجهيز والنقل باش تحول الملكية ديال طوموبيل وتولي بسميتك. يعني تبدل لكارط كريييز.
لكن هنا كتكون رتاكبتي خطأ كبير وتقدر تندم عليه.
كيفاااااااش؟؟؟؟؟؟؟
حيت من بعد ما كترجع باش تاخد لكارط كرييز جديدة بسميتك، يمكن يقول ليك الموظف لي مكلف بملف : هاد السيارة مايمكنش تحول الملكية ديالها حيت كاين واحد التعرض على البيع ديالها بسبب شي موشكيل عند السيد لي باع ليك.
فهاد اللحظة كايطيح لما فركابي وكتقول فنفسك صافي تصيدت ومشيت فيها.
كتسول لموظف علاش هاد التعرض؟؟؟؟؟
كيجاوبك :
1- يمكن يكون مول سيارة مامخلصش الضريبة السنوية.
2- يمكن تكون لمحكمة دايرة شي حجز تحفظي على السيارة بسبب شي دعوى.
3- يمكن صاحب السيارة كيتسالو شي دين عمومي.
لمهم كاين شي موشكيل لي كيمنع انتقال الملكية ديال السيارة بسبب التعرض ولي كيتسمى فالقانون ب " وضع اليد".
وبالتالي خاص سيد لي باع ليك السيارة يجي ويحل هد لموشكيل.
فهد لحظة كتجبد تليفون وكتعيط ليه باش يجي يفك هد روينة أو يرد ليك فلوسك او........
ولكن للأسف كتجاوبك اتصالات لمغرب وكتقول ليك: لايوجد اي مشترك في الرقم الذي تطلبونه.
هنا كتعرف راسك تصيدتي وتنصب عليك.
إوا أسيدي ماتبقاش تزرب بزاف...
ونهار تلقى السيارة لي عجباتك وقبل ماتجيب لمعلم يشوفها ويقلبها وقبل ماتعيط لمولاها باش تفاهم معاه، دخل للنظام المعلوماتي للمركبات لي دارتو وزارة التجهيز والنقل على الموقع : www.assiaqacard.ma
http://opposition.narsa.gov.ma/
وكتب الرقم ديال السيارة ودير بحث وغادي طلع ليك بزااف ديال لمعلومات على السيارة وتعرف واش كاين شي تعرض عليها أو لا.
هاد الموقع دارتو الوزارة باش تفادى هذ النوع ديال لمشاكيييل وفنفس لوقت باش تحارب النصابا.
وبالتالي مابقا مسموح لا تاواحد يقول شريت طوموبيل وتصيدت وتنصب عليا حيت كاين لحل.