أشنو خاصك تعرف الا خديتي كريدي الاستهلاك

بالنسبة للناس لي واخدين كريدي أو فكرو ياخدوه.. كاينين شي حوايج خصّك تعرفهم..
الكريدي ديال الإستهلاك ملي كتاخدو كتولي ملزم أنك تسدد الطريطات ديالك كل شهر.. وإلى خليتي شي وحدة حتى للشهر الجاي كايزيدو فوائد التأخير...

توجد إمكانية طلب تأجيل سداد القرض والتي تصل الى 24 شهر، ولكن طلب ديالك لازم يكون عن طريق المحكمة واللي بدورها كاتصادق عليه إلا في الحالات الظروف القاهرة مثلا كفقدان الشغل
لا قدّر الله شي حد مابقاش خدام، البنكة مكتسمحش فحقها، ملي كتعطل على الطريطا ديالك كيعيطو لك مرارا وتكرارا... جبتي الفلوس خلّصتي مزيان، مخلصتيش كيبقاو يتجمعو عليك الطريطات واحد المدة محددة ديال الأشهر وكايسيفطو الضوسي ديالك لواحد المصلحة متخصصة فهادشي.. هاد المصلحة حتى هي بدورها كتعيّط عليك وكتقول ليك حنا دابا لي مكلفين، واش باغي تخلّص ولا لا؟؟ بغيتي مزيان، مابغيتيش غادي يسيفطو الضوسي ديالك للمحامي..
هاد الأخير لي حتى هو بدورو كيقوم بتخويف المعني بالأمر باش يخلّص سواء باتصالات هاتفية، سواء برسائل بريدية..
نقولو أنك ماعندك باش تخلّص ولا تجاهلتي الأمر ومابغيتيش... المحامي كيدفع الضوسي للمحكمة، لي من طبيعة الحال كتستدعيك للجلسة وكتعطيك مدة محدودة باش إما تخلّص لي عليك وتهني راسك، ولا يقومو بالسيزي ديال أي حاجة كتملكها عندها قيمة (دار، طموبيل، أرض، محل.....).
مثلا شي حد محضرش للمحكمة، كيتحكم عليه غيابيا، إلى عندو ميتحجز البنك كيتبع مسطرة الحجز، إلى معندوش كيتسنى حتى يولي عندو....
للإشارة الإكراه البدني مكاينش فقرض الإستهلاك..
البنك للأسف مكيعرفش بلي هذا خدام ولا مخدامش..
الحالة الوحيدة لي كتعطيك فيها التيقار هي فاش كتموت أولا فاش كتعطيهم شهادة العجز..
وكما العادة لي عندو معلومات إضافية ولا تصحيح يفيدنا به..
تحياتي..